Олма чевер текст песни
Обновлено: 19.09.2024
Тиде мурым могай марий еҥ ок пале?! Василий Регеж-Гороховын почеламутшылан семым Иван Егоров возен, мурым Татьяна Денисова да молат уло кумылын йоҥгалтарат. А марий ÿдырын ойыртемалтше койышыжым, шкем тыматлын кучен моштымыжым, мастарлыкшым, моторлыкшым у конкурс эше ик гана пеҥгыдемдыш. Марий кугыжаныш университет Марий Эл Республик кÿкшытыштö «Марий мотор ӱдыр» конкурсым икымше гана 2015 ий 26 ноябрьыште эртарыш.
Марий Элын Волжский, Звенигово, Кужэҥер, Курыкмарий, Морко, Оршанке, Советский, У Торъял, Шернур районлаж гыч да Пошкырт ден Татарстан кундемла гыч 11 ӱдыр шке вийжым М.Шкетан лӱмеш Марий кугыжаныш драме театрын сценыштыже тергыш. Кажныже шочмо-кушмо вержым «аралыш», тушто илыше калыкын ойыртемалтше койыш-шоктышыжым ончыктыш, сӧрал вер-шӧржӧ дене палдарыш.
Конкурс тӱҥалтышыште МарГУ-н икымше проректоржо Олег Сидоров мутым ойлыш, ӱдыр-влаклан сайын жапым эртараш да шкеныштым эн сӧрал могыр гыч ончыкташ тыланыш.
Эн ондак «Модный дефиле» лӱман конкурс эртыш. Тушто конкурсантке-влак кызытсе илышлан келшен толшо стилизованный марий тувырым ончыктышт. Кажныже мо дене гынат ойыртемалте, кажныжын у марий тувыр нерген шонымашыже почылто.
Умбакыже ӱдыр-влак видеовизиткым ончыктышт, шочмо-кушмо вер дене палемдарышт.
«Марий калыкын йӱла ден пайремышт» конкурс эн оҥай лие. Ӱдыр-влак Рошто, Семык, Шорыкйол пайрем-влакым эртарыме ойыртем нерген каласкалышт. Тыгак шинчымаш касым эртарыме, шочшо азам суртыш кондымо, рвезым армийыш ужатыме, йочан кепшылым руымо, сӱанлан кумалтышым ямдылыме йӱла дене палдарышт. Чылажат изи сценке семын ончыкталте, ӱдыр-влак тыршен модыч.
Умбакыжат нунын мастарлыкыштым тергышт. Икте марий мурым сылнын муралтыш, весе чаплын кушталтыш, кумшо почеламутым сöралын лудо… Мутат уке, кажне ӱдыр талантан.
Пытартышлан дефиле лик, ӱдыр-влак мотор кас тувыр дене сценыште лывыла ийыч.
Тыгеракын, конкурсышто «Марий мотор ӱдыр» лӱмым Шернур район гыч Анастасия Ямбаршева сулыш. Ончыкшым тудо Марий Элын чапшым «Финно-Угрийын миссше» конкурсышто аралаш тӱҥалеш.
А «Вице-мисс» Пошкырт кундем гыч Мария Тимиряева лие.
Моло ӱдырымат тӱрлӧ номинацийыште палемдышт:
«Граций мисс», «Келшымаш мисс» – Людмила Карпова (Морко район);
«Поэзий мисс» – Марина Ведерникова (Оршанке район);
«Усталык мисс» да «Интернет мисс» – Алина Макарова (Волжский район);
«Сымыстарышк мисс» – Анастасия Галиева (Татарстан Республик);
«Мисс-фэшн» да «Ончаш толшо-влакын миссше» – Ксения Егорова (Советский район);
«Артистизм мисс» – Полина Савельева (Кужэҥер район);
«Стиль мисс» – Татьяна Семёнова (Курыкмарий район);
«Шыргыжмаш мисс» – Елена Соловьёва (У Торъял район);
«Талант мисс» – Анастасия Царегородцева (Звенигово район).
«Марий мотор ӱдыр» конкурс моткоч кӱлешан да оҥай, но мероприятий годым, чаманаш логалеш, шукыжым рушла ойлышт. Туге гынат марий ÿдыр деч чаплым тÿняштыжат от му! Марий койышыжо, марла сылнын ойлен, муралтен колтымыжо, калык тӱвырам, йӱлам палымыже весе деч ойыртемалтшым ышта.
Анастасия Ямбаршева («Мотор марий ӱдыр» конкурсын миссше):
- Кеч-могай пашалан кыртмен пижат гын веле сай лектышым вучаш лиеш. «Марий мотор ӱдыр» конкурсышто участвоватлыме нерген изиш варашрак пален нальым гынат, тиде пашалан чот ямдылалтым.
Изи годсек марий йӱла деке лишыл улам. Сандене конкурсыштат куштылго лие. Теве изи йочалан кепшылым руымо йӱлам ончыктышым. Ты йӱла нерген шукынжо огытат пале, а мыланем изием годым авам ден ковам кепшылым руалыныт. Тидын нергенак авай каласкален. Тыге кӱлешан йӱла дене молымат куштылгын палдарышым.
Тыгак азан ватын мурыжым мурышым. Калык мурын кажне корныжым лудмо годым чонлан ласкан, куштылгын чучеш, чонышто ала-могай умылыдымо вий озалана. Тидым, очыни, чын марий еҥ веле умыла.
А конкурс тӱҥалтыште изишак ойгырышым. Но сценыш лекме годым чыла мондалтын, угыч да угыч шкем сай могыр гыч ончыктымо шуо. Сеҥышыш лекме нерген шонен омыл. Увертарымекышт, шӱмем кум пачаш писынрак кӱлткаш тӱҥылмыла чучо. Вигак ӱшанен омыл. Туге гынат чот куанышым.
Анастасия Галиева («Сымыстарыше мисс»):
- Мый Татарстан кундем Актаныш район Мари-Суксу ял гыч улам. Тунемам калыкле тӱвыра да тӱвыра кокласе коммуникаций институтын 1 курсыштыжо. Мутат уке, конкурслан ямдылалтме годым нелылык лектын. Шке сценарийым возыман, мастарлык номерым ямдылыман, клипым ыштыман. Да, шуко шонаш логале. Вуйым сакен шинчаш жап ыш лий. Тыгодым ача-авам, кувавам пеш чот полшышт. Кажныже ой-каҥашым пуыш.
Тыгак интернет йӱклымаште Татарстанысе марий калык мылам полшыш. Нунылан таум ойлем.
Тиде конкурс годым ме пеш шуко йӱлам пален нална, у йолташ-ӱдыр-влак дене палыме лийна. А тыгай мероприятийын марий калыкын тӱвыражым аралаш полша.
Алина Макарова («Усталык мисс» да «Интернет мисс»):
- Конкурслан моткоч кÿчык жапыште ямдылалтна, но тиде пагыт пеш весела да лектышан лие. Теве мый конкурс годым мужедмашым ончыктышым, шочмо районем нерген ролик дене палдарышым. Тыгак шиялтыш сем дене куандарышым. Тыгай конкурс-влак умбакыжат лийышт.
Автор: Анна Васильева, «Арслан» журналын корреспондентше.
Читайте также: